Nwabu ndini, awuve umubi. Uyasiphoxa thina sonke! lesi kwakuyisikhalo sezilwane ezazihlala emfuleni. Ngokuhamba kwesikhathi, uNwabu lugcina seluwakholwa la mazwi anonya. Ngenxa yokuba nesizungu nokuphelelwa yithemba uNwabu seluhlala lwethukile ngokuzokwenzeka ngomuso. Kepha izigameko ezilandelayo lapho uNwabu luhlangana nenyoni nekhehla kuholela ezigamekweni eziguqula impilo yalo. UNwabu Oluculayo, indaba emangalisayo esuselwe enganekwaneni yaseMalawi. Ixoxwa umbhali nomxoxi wezindaba ohlonishwa umhlaba wonke, uGcina Mhlophe. Le ncwadi inezithombe ezinhle ezigqamile ezidwetshwe ngumdwebi owaziwayo, uKalle Becker. Ukungakhululeki koNwabu kanye nempatho engeyinhle yezilwane zasemfuleni kuzokwenza abafundi bale ncwadi abadala nabancane bahlabeke umxhwele.