Kalli word weer deur SIS ingeroep om hand by te sit. Twee gesellinne van 'n swierige klub vir gesellinne is vermoor en die lyke grieselrig uitgestal. Die forensiese span vind absoluut geen leidrade nie en die afleiding word gemaak dat die moordenaar gesorg het dat hy volledig - van kop tot tone bedek was toe hy gemoor het. Maar hoekom verskil die modus operandi van die twee moorde dan? Hoe het hy daarin geslaag om by die klub in te kom en hoe het hy dit reggekry om die twee meisies so maklik te oorrompel? Die veiligheidsmaatreels by die klub was goed, maar is verder opgeskerp na die eerste moord. Die eerste afleiding is dat dit een van die kliente van die klub moes gewees het en die SIS en die SAPD se soektog brei wyd uit. Hulle ondervra selfs 'n pastoor wat die klub besoek het en uitgevaar het oor die sondes! Die soektogte lewer niks op nie en die moreel van die ondersoekers word by die dag laer. Kalli voer gesprekke met die gesellinne van die klub. Hulle bly nou almal in die een huis saam om veiligheidsredes. Die polisie bewaak die plek. In die proses word Kalli blootgesel aan die lewe van gesellinne en raak vertroud met 'n wereld van kindermolestering en seksuele teistering. Dit ontstig haar geweldig maar die groot skok kom toe haar vier en 'n half jaar oue dogtertjie verdwyn.